مدونة فهد المحارب

من زمان ما شفنا مناقر بين الهلال والنصر على لاعب. الصجة اللي صارت خلال الاسبوع الماضي على عيسى المحياني ما اشوف انها تستاهل لدرجة المزايدة, ترا مب من زين لعبه !! المحياني والله حرام فيه 28 مليون ريال حتى 10 مليون والله حرام تندفع فيه . يعني لاهوب اللاعب المهاري اللي تقول يشيل الفريق او لاعب قائد , اوكي هداف لكن ما يستاهل المبلغ هذا كله وهالمزايده. النصر أبد ما يحتاج لاعب في خانة الهجوم كل اللي يحتاجه هو كم لاعب في خانة الوسط. مبلغ اللاعب راح يكلف النصر لدرجة انه ما راح يجيب غيره هالموسم وبيحط حيله في لاعب بينما يقدر يوظف هالمبلغ في جلب أكثر من لاعب في خانة الوسط والدفاع.

اذا رغبة اللاعب في الهلال خلاص يروح للهلال وبلى صجة واتمنى من النصراويين انهم يتنازلون عن اللاعب لانه مب اللاعب اللي يندفع فيه هالمبلغ لكن اذا جا خير وبركة حياه الله لكن ما راح يأدي مثل ما راح يأدي مع الهلال بكل بساطة لان ما وراه وسط ولان نفسية اللاعب ما راح تخليه يبدع اذا كان يلعب مع فريق مايبيه.

بعد الأداء الباهت للمنتخب اليوم قدام قطر , جزمت بأن بطولة الخليج هي أكبر من منتخبنا وهذا وجهي لو تأهلنا بالتشكيلة هذي اللي أثبتوا بالفعل بأنهم لاعبين أندية ,, والا هذا لعب ياسر والا الفريدي مع الهلال ؟؟ لاعبين ما يقدرون يسلمون كورة صح ولا نقعد نتحجج بلياقة المنتخب القطري اذا حنا ما قدرنا نوصل كورة صح وكل كورنا مقطوعة زياده على أنانية بعض اللاعبين اللي جايين لعمان تغيير جو. اذا أفضل لاعبين في المملكة ويعتبرون كمستويات شخصية أفضل من الفريق القطري ما قدروا يسوون شي ولا قدروا يوصلون كورة وحده صح للهجوم فأتمنى أننا نلعب المباريات القادمة كـ تحصيل حاصل وحفاظ على اسم المنتخب فقط ولا نحلم كثير بتحقيق البطولة ولا حتى التأهل لكاس العالم لاننا مب كفو.

المدرب برئ جدا من نتيجة اليوم , المدرب ما راح ينزل الملعب ويعلمهم شلون يمررون كورة والا شلون ما تصير اناني لما يفتح معك خويك وتستمر تراوغ وتعدي. المدرب أخطأ خطأ كبير وفضح نفسه يوم ما تجرأ يغير ياسر السيء وغيّر مالك البثر اللي يحسسك انه يحاول يسوي شي في المباراة. ما راح يغير شي المدرب لما يكون اللاعبين ماعندهم الدافع انهم يلعبون, لما يكون اللاعب مايدري ليه يلعب هالبطولة من كثرة الاهداف اللي يسمعها من المدرب , مرة يقول انا داخل كـ اعداد للبطولة ومرة يقول ان شاء الله بناخذ البطولة. حدد هدفك وش تبي من هالبطولة, شفنا المنتخب في كاس اسيا كان عندهم هدف اللي هو الكاس وابدع المنتخب مع انجوس لكن بعد كاس اسيا نزل مستوى المنتخب بشكل مخيف لين وصلنا المستوى اللي نشوفه الحين. لكن هذا مب عذر انك ما تقدم حتى مستوى نقول والله لعبنا لكن ما توفقنا لكن لا لعب ولا شي داخل كأن هالتسعين دقيقه مشغلتك في يومك وتبي تقضيها قلنا يالله نلعب مباراة.

بطولة هالسنة مافيه وتأهل لكاس العالم مافيه وآخر عهد ناصر الجوهر بالمنتخب نهاية البطولة , وراح يجي مدرب كويس ان قدر يأهلهم لكاس العالم بمعجزة راح يتغير بحجة أنه مو مدرب المرحلة , حنا نبي مدرب يأهلنا ومدرب يلعب بنا كاس العالم ومدربين بعد كاس العالم نقضي وقتنا عليهم ونعطي الصحافة تكتب شي بدال ماهي فاضيه ماعندها شي تكتبه.

اليوم الدفاع والحارس مع المحاور أبطال بكل ماتعنيه الكلمة في تخليص هجمات القطريين بدون هفوات دفاعنا المعتادة , ان شاء الله يستمرون على هالمستوى ولا يخورون قدام اليمن بحجة أنها ضعيفه وياخوفي من القشة اللي بتقص ظهورنا.

اجتمعت ادارة نادي النصر في اليومين اللي راحت وتمخض هالاجتماع باستقالة النائب اللي اشوفها من وجهة نظري شغلة تكتيكيه لاسقاط النائب المرشح. الوليد بن بدر فشل فشل ذريع خلال فترته فلم يحقق أي شي يذكر سوا البيانات وموقع النصر الرسمي “المكمم للأفواه” والذي لا يرقى لمستوى الطموح النصراوي وغير الامور اللي تسبب فيها من ابعاد لأعضاء داعمين. ترشيح الامير فيصل بن تركي في هالوقت بالذات هو لاحراق ورقته عند الجماهير فنجاحه يعتبر نجاح لهالادارة وفشله راح يقصد منه انه هذا فيصلكم اللي تبونه ما سوى شي وراح يستبعد من قبل الجمهور بعدم رضاهم عنه في فترة رئاسته بعد تنتهي فترة الرئاسه الحالية.

السيناريو المتوقع خلال الفترة الجاية .. الامير فيصل بن تركي راح يتسمر بالاسلوب الحالي ولا راح يدفع فلوس يجيّر مجدها للرئاسه الحالية في حال جلب نجوم او تحقيق بطولة مثل ما جيّر تأهل النصر لكاس العالم  للفيصل بن عبدالرحمن مع انه كان الجهد كامل لوالده عبدالرحمن بن سعود.