أيام ما البترول على 100 و 140 دولار كلن رفع أسعاره -حتى المطبق – وقلنا اوكي معكم حق والله يعينكم ,, لكن الحين البترول بـ 40 دولار ليش ما تنزل اسعارك ؟؟ أذكر اول ما جيت استراليا كان فيه كافيه واشتري منه الكفي حقي بحول 3 دولار عقب ما ارتفع البترول رفع السعر دولار واحد .. سألته ليش طيب ؟؟ وتحجج بسعر البترول قلت اوكي ماعندك مشكلة .. لكن الى اليوم والسعر نفسه ما غيره وكأنه تعود على على السعر وشاف الناس متعوده عليه وراح يخليه على حاله بحجة أني يوم رفعت السعر كنت تدفع ليه انزل السعر؟؟ وقس على هالكلام كل المواد الغذائيه

ألاحظ في الايام هذي زيادة الوعي لدى المستهلك السعودي باقتناء النسخة الأصلية من كل شي ابتداء بالبرامج وانتهاء بالملابس الرياضية ,, والا من متى نشوف احد يشتري طقم اصلي والا اكوام البرامج الاصلية في محل والناس تشيل منها ؟؟

مثل ماتشوفون الستايل الجديد توني مخلص منه بمساعدة يزيد الغريبي هو اللي عدل الهيدر بالصورة اللي تشوفونها الحين ,, كانه مب زين فتراه منه
المربع الأخضر بيكون للتدوينات السريعة اللي ما تتحمل تدوينه كاملة .. مثل هالتدوينه مثلا

عندما تستمع أو تقرأ تصريحات بعض المسؤولين، التي يتناولون فيها شأناً عاماً يمس حياة الناس ومعيشتهم ودنياهم ومصادر دخلهم، لا تملك أن تقول إلا… ليته سكت.
في أحيان كثيرة يتجاوز المسؤول المنطق إلى مرحلة إثارة حفيظة الجمهور، وعندما يكون هذا التصريح في رمضان، ستتساءل: كيف لم يربط شيطان هذا المسؤول في هذا الشهر الكريم؟!
لا أحد يعيش على هذه البسيطة لا يعرف بنار الغلاء التي تأكل الأخضر واليابس. صحيح أن هناك من أغدق الله عليهم الخير، حتى لا يفرقوا بين ورقة البنكنوت التي قيمتها ريال وزميلتها ذات الخمسمائة، ليس لأنهما ورق، بل لأن القيم المالية لا تعني في مقياسه شيئاً بالنظر إلى الوفرة التي منّ الله عليه بها، ومعظم هؤلاء لا يذهبون إلى سوق الخضار ليشتروا مقاضي أهلهم وأولادهم، ولا يقفون في صفوف الانتظار لشراء التميس، ولم يخرجوا محافظهم ليدفعوا قيمة حليب سواءً كان مجففاً أو سائلاً. لكنهم يعيشون بيننا، ويتعاطون مع الاقتصاد العالمي، وتغشاهم أخبار الغلاء، وأنباء التضخم، والحقيقة أنهم ينعمون بضخامة هذا التضخم في حساباتهم وأموالهم، وبالتالي فهم يسمعون بالغلاء هنا وهناك… وما بينهما.
إذا علمنا كل ذلك، فقولوا لي بربكم كيف تصنفون تصريحات وكيل وزارة التعليم العالي، لشؤون الابتعاث، الدكتور عبدالله الموسى في ملتقى الإعلاميين في مدينة الرياض قبل أيام، عندما علّق على شكاوى طلاب الابتعاث من قلة مكافأة الابتعاث، مقارنة بغلاء الأسعار، وهو يؤكد أن المكافأة تكفي، أما سياحة الطالب وأكله في (ستار بكس)، فليست مسؤولية الوزارة!
حتى عندما يكون المسؤول منطقياً، فإن عدم اكتراثه بأزمات الناس، وتعاطيه مع معاناتهم بشيء من التهكم، مظنة لوقوعه في الخطأ، وتأليب الناس على الحكومة التي يمثلها هذا المسؤول.
فاصلة أخيرة: أشار الدكتور الموسى إلى أنه كان يركب الدراجة في ألمانيا في ذهابه إلى الجامعة، مستدلاً بذلك على معاناته الشخصية، طالباً، ولو بشكل غير مباشر، من الطلاب في الخارج. حسناً، نهنيء سعادته على هذه السيرة الحميدة، لكن القرش اليوم لا يساوي عشر قرش الوكيل، وقارن يا دكتور عبدالله (قيمة) ثمن الدراجة آنذاك بثمن كوب من القهوة في ستار بكس، اليوم… إن شئت!

هذا مقال تركي الدخيل في جريدة الوطن عن رفض زيادة مكافآت الطلاب المبتعثين. يعني بغض النظر عن اللي يفطر في ستار بكس ويتعشى في احسن مطعم وكأنه جاي سياحة مب دراسة وش وضع اللي عايشين على المكافاه وشغل صكصكه وهو اذا دخل السوبرماركت يدفع 100 دولار على خرابيط ؟؟ التضخم وصل هنا اكثر من 100% عن بداية السنة وانا من بداية السنة وانا في استراليا واحس بالفرق الشي اللي كنت تشتريه بـ دولارين الحين ما تلقاه بأقل من اربع دولار غير الاجارات اللي تحوسك حوس لين ما تلقى شي مناسب لك وعلى قد مكافاتك لانك تعتبر محظوظ لو صرفت نص المكافاه على اجار بس. حنا ما نقول عطونا شي نتفشخر فيه لكن على الاقل الواحد ما يقعد اخر الشهر يعابل عمره كود المكافاه تكفيه. ولا تقول اسكن انت وكم واحد معك برضوه ما ينفع لانك لو وفرت في الاجار راح يتضاعف صرفك في الاكل والكهرب << حسيت اني ابو عيال ..

ينظم المعهد مع المعاهد الثانيه مباريات وديه يجمعون لهم كم واحد ويفرقون في ملعب صدقي مب استراحة .. لعبنا المباراة الاولى قبل اسبوعين كانوا كلهم برازيليين الا انا وكل واحد فيهم صاير ماردونا وانصكينا 4-1 وكان اللعب بربسه لدرجة كل هجمه مغيرين الحارس .

لعبنا المباراة الثانيه الاسبوع الماضي وسبحان الله كن ظافر ابو زنده هو الحكم . لكن في الاخر هالبرازيليين فنانين لكن لين جا الجد ماعندك احد واحسن مافينا المدرب اللي ماشي على نظام ناصر الجوهر شدو حيلكم وبنفوز ,, الاسبوع الثاني رحت واشتري لي كنادر ذكرتني باوهين كيندي .. ونجي ونلعب والظاهر انها سوت تاثير عليهم ,, كن مافيه في الملعب الا انا يكسرونه لدرجة وصلت انهم يكسروني وياخذون الفاول هم

الطريف وشو .. ان هالبرازيليين فيهم انانيه مابعد شفتها في احد يمسك الكورة من الدفاع للهجوم ما عنده مشكلة انه ما يناول وخله يلعب على مزاجه لا تقوله امسك هالخانه والا رح لهالخانه والا امسك حارس ,, انا برازيلي وامسك حارس ؟ ياعيباه بس

أحدث اليوتيوب طفرة في مشاهدة مقاطع الفديو عبر الانترنت ومشاركتها مع الاخرين بعض الاشخاص تجده ادمن الجلوس على الانترنت بسبب الموقع. أعرف شخص ماكان يعرف من الانترنت الا الايميل لكن بعد ما عرفوه الشباب على اليوتوب ماعاد قام من على الجهاز.

مدمن اليوتوب هو اللي دايم تلقى ماسنجره بالخارج , مايبي احد يكلمه وفي بعض الاحيان تلقاه حاط رابط لمقطع في البرسونال مسج حقه وفي احايين كثيره لين سولفت معه سحب عليك بدون ما يحس وهو يشوف له مقطع. تلقاه احيانا اذا كان يطقطق عليه والا لقى شي مضحك تلقاه يوزع الرابط على اللي في الماسنجر كلهم وممكن يحطه توبيك عشان يوصل للي حاضرينه

مدمن اليوتوب تلقاه دايم لحاله ورافع للسماعات عشان تسمعون معه ما ينفع يسمع لحاله وان تجمّل تلقاه حاط سماعات لكن ما راح يفكك من اصوات الضحك مع كل مقطع. وكله كوم وانه يجي يقول تعال شف هالمقطع ,, طبعا تجامل وتجي تشوف وتضحك مجاملة لكن في الاخير تقول ,, وش يحس به ذا ؟؟؟