لو شفنا فكرة ساعة الارض نشوف انها فكرة سخيفة يعني لمبتي هي اللي بتحل مشكلة الاحتباس الحراري ؟؟ مثل هالتفكير هو اللي قتلنا النظر لانفسنا كأننا معزولين عن المجتمع وان اي مشكلة تحدث ننظر لانفسنا كاننا غير مسؤولين عن هنا بأي شكل وبأي نسبة.
فكرة ساعة الارض هي انك تطفي كل شي ماله داعي ومحطوط على الstand by, يعني يمكن احتاجه بعدين واشغله على طول , طيب طفه ولين بغيته شغله, الفكرة هي انك تطفي كل شي على وضع الستاند باي ومالك فيه حاجه بالعكس انت تعتقد انك مطفيه الحين لكن في الحقيقه هو يزيد على فاتورتك وانت ما استخدمته ولا تحتاجه يعني طف اي شي مالك حاجة فيه منها تساعد في حل المشكلة ومنها توفر في فاتورتك, واجد كذا ؟؟ ماله داعي كل لمبات البيت مولعه و4 تلفزيونات مثلها غير الكمبيوتر اللي شغال 24 ساعه وماله حاجه. طفها ولين احتجتها شغلها ثانيه. اشياء ضرورية مثل الثلاجة مانقدر نطفيها لان حاجتها دايمه.

الاعلانات هنا دايم طفوا اللي مالكم حاجة فيه عشان فاتورتكم ما تجي عالية , يعني ماهوب ضارك لين طلعت من الملحق تطفي البلايستيشن والرسيفر والتلفزيون واسهل لك اشبكها في توصيلة وحده وطفها من الجدار وتطفى كلها مرة وحده. العام الماضي كانت سدني هي اول مدينة تسوي الحركة واشترك فيها 2 مليون شخص ووفروا 10% من الاستهلاك في ساعه ,, لو كان طول اليوم ساعة الارض وطول اليوم كم بيكون التوفير ؟ السنة هذي اشترك فيها 100 مليون شخص حول العالم

its wordpress 2.5

شفت الكاريكاتير الصبح وقلت هذا في السعوية شلون هنا !! هنا كل اعتمادهم على موية المطر اذا وقف المطر عنهم ماتوا من العطش. الترشيد وصل بهم موصل انه اول ما توصل يقولون لك ترا لين جيت بتاخذ شاور ما تتعدى 4 دقايق تحت المويه غير انك ممنوع انك تغسل سيارتك عن باب بيتكم لذلك تشوف السيارات لين جت بتمطر كلها برا ولين وقف المطر تشوفهم يمسحون السيارة واحلى تغسيلة بدل هندي المحطة وبعض الاحيان مثل الفترة هذي كانت الامطار فوق المتوقع لدرجة انه كان فيه فيضانات فأعلنوا في التلفزيون ان هالاسبوع سوو اللي تبون بتغسل موترك تروش على مزاج كبكب مياه على كيف كيفك بس هالويك اند غير كذا نرجع زي اول. وفعلا لما كنت ساكن مع العائلة كانوا مبسوطين يقولون السيارة من سنة محد غسلها.

غير اللي على الشاطئ فيه بزابيز مويه للي يبي يغسل جسمه عقب البحر والا يبي يغسل رجليه عقب الرمل , يوم شافوا هالعالم تستهبل بالمويه قفلوها كلها وقالوا ماعندنا مويه كافيه لك انت وياه يومك تكبكب
يسولفون علينا في المعهد انه هالسنة كانت أكثر سنة تجي امطار فيها من 10 سنين وانه جتهم فترة من الفترات خزان المويه حق المدينة مخلص مافيه ولا قطرة تخيل الوضع عايش في بيتكم ماعندك مويه ومدري شلون مشّوا وضعهم ذيك الفترة لين ما جاهم مطر .

لذلك ياشباب اقتصدوا مابي اجي والقى المويه خالصه

انتهيت منذ لحظات من مشاهدة Into the wild لم أتمكن من متابعة مباراة المنتخب مع اوزباكستان لتردي حالة الاتصال بسبب الامطار

يحكي الفلم قصة شاب سئم الحياة الاجتماعية وحياة “الدلع” التي هيئها له والديه بدئاً من دعمه ماليا لانهاء تعليمه انتهاءً الى توفير جميع ما يرغب ومالا يرغب الى ان وصل به الحال ان سئم من هذه المعاملة قرر بعدها الذهاب الى ألاسكا حيث اراد ان يعيش هناك بعيدا عن الحياة المدنية وحياة النفاق الاجتماعي التي كان تلازمه في تلك الفترة.

النفاق الاجتماعي موجود في جميع المجتمعات بدون استثناء ولكن لا يصل حد السؤم والانقطاع عن الحياة الاجتماعية لمجرد انك لم تستطع تحمل مثل هذه الافعال وبدء مغامرة غير محسوبة من أجل تحقيق امر تريده او تريد اكتشافه حتى وان لم يكن النفاق الاجتماعي هو سبب الهروب والانعزال عن الناس.

الفلم يحكي قصته من بداية فكرة الذهاب الى الاسكا وماهيب المحطات التي مر من خلالها وطبيعة الاشخاص الذين التقى بهم خلال رحلته حتى وصل به الحال الى تغيير اسمه واتلاف جميع مايثبت شخصيته بل تعدى اكثر من ذلك الى وصل به الامر الى احراق جميع مايملك من مال من اجل انعزاله التام عن العالم ولاثبات ان المال لم يكن يوما لجلب السعادة التي يرجوها في رحلته.

أفكار الشاب غريبه بعض الاشياء وخصوصا في فكرة الانعزال عن العالم وبدء حياة بادية وبدائيه بدايةً من العيش على صيد الحيوانات للاكل وتسخين الماء للاستحمام حتى التداوي بالاشعاب التي لاول مرة يسمع بها والاعتماد على كتاب يتحدث عن هذه الاعشاب والمخاطرة حتى أوصلته هذه الحالة الى الموت !! “جب معك كرتون بندول وفلوتاب وافتك ”

جميع هذه الامور لا تلغي من روعة الفلم وطريقة سرد أحداثه ووصف الحالة النفسية للشخص واظهار التباين في مشاعر الابوين قبل وبعد رحيلة.

ختاما , ينصح بمشاهدته

Finally, its a matter of time za3eeg

كل دولة تتميز بطبخة معينه ما تلقاها في اي مكان في العالم الا في هالدولة او في دولة ثانية لكن ما يسويها الا نفس اهل البلد. اليابانيين تلقاهم يفاخرون بالسوشي والبرازيليين يفاخرون بالباربكيو اللي ما يصلحه مضبوط الا هم ,, حتى وقت قريب كنت اعتقد الكبسة هي سمة لأهل الخليج بمختلف وصفاتها لكن!! والخوف من لكن .. الحقيقه المرة اننا نعتقد انها كذا لكن في الواقع ان الكل يقدر يسويها واحيان بوصفات أفضل منها في الخليج.

مرة في الكلاس كان فيه موضوع عن الاكل وكل شخص يوصف أكلة تقليدية في ديرته وجا الدور علي وقمت اوصف لهم الكبسة ,, في الاخر قالوا يعني رز ؟؟ قلت ايه رز قالوا وغيره طيب ؟؟؟
لذلك دوروا لكم وصفة تفاخرون بها برا غير الكبسة

أصعب ما يواجه المبتعث في مقر الدراسة هو مسالة الطبخ , في بيتكم اما الوالدة والا الشغالة هي اللي ترتب وتطبخ لك, أما كنت يوم لحالك ما تكلف عمرك الا اتصال على اقرب مطعم والاكل يوصل لبيتكم .. الوضع هنا ما يمشي ابد والا اسبوع وانت مطفر خصوصا اذا كنت من الناس اللي تحرق البيض

انا مانيب بعيد هالنوعية , اول ما وصلت هنا وبديت اطبخ ماعاد لقيت الاشياء اللي متعود على اني اشوفها في السعودية خذ عندك ,, اول ما بديت اطبخ قلت بحاول اسوي رز , اعرف اسويه لكن لازم فيه ضحايا عقب الطبخ -قدر محترق-
الرز هنا انواعه كثيرة لدرجة انك تحتار وش تاخذ , ومن الدباشه خذت رز الاسيويين واللي يصلح لطبخاتهم , واجيبه واطبخه لكن ماش مو نفس اللي تعودنا عليه يعني ما يمديك تحطه في القدر الا وهو ناشب ما يمديك تسوي شي الين ما طفشت من القدر المحروق ولا عاد طبخت رز عقبها ..
قبل هذا كله كنت معبي الثلاجة اشياء للتحمير -اصابع سمك وناقت واللذي منه- وعايش عليهم ,, زين الواحد ينام خفيف والا ؟

خلال هالفترة كان سوق الخبز والجبن وكاس الشاي ماشي بعنف الى ما تعلمت اسوي ستيكات واحمر بطاطس واتفنن فيها بعد لين وصلت لمرحلة قلت خلاص لازم اتعلم اسوي الرز زي الناس وافتك من اكلهم اللي مافيه طعم.

لكن تضل المعضلة الكبرى هي غسيل الصحون ولا القدر لين احترق ,, الله يلوم اللي يلوم الحريم .
بعدها تعلمنا طبخ كبسة الرز مع اللحم ووشلون نتفنن فيها بعد واللي جايع لا يشوف الصورة .. ترا اللحم مب محترق عشان محد يصجنا يقول ما تعرف تطبخ

واشين مافي الموضوع ,, القدر لين الحين ما غسل

خلال الفترة اللي قعدتها في استراليا بالرغم من قصرها الا اني أيقنت سرعة نمو هذا البلد بالرغم من قصر المدة التي تم اكتشافه فيها وخصوصا الرياضة فيها والسياسة الرياضية المتبعه فيه.

الشهر الماضي تم افتتاح ملعب بالرغم من انه لم يتجاوز في مساحته مساحة ملعب الملز الا انه يفوقه بكثير في عملية التنظيم !! نبدأ بما يخص الاندية التي تقام مبارياتها في هذا الملعب, هذا الملعب ملك للحكومة الاسترالية ولكن على كل فريق دفع 3 مليون دولار سنويا لاقامة المباريات على هذا الاستاد يعني اذا ماكان عندك المصدر المالي القوي والا ما فيه حاجه انك تضغط نفسك عشان تلعب كورة اللي بتخلق لك بعدين مشاكل اطراف كثيرة تبدا من اللاعب وتنتهي لاخر شخص في النادي وبالمناسبة ليس باستطاعة أي شخص الذهاب للاستاد بسيارته الخاصه فالملعب مجهز بمحطه قطار ومحطات للباص وجميع التذاكر تستطيع شراءها من الباص اذا اردت الذهاب الى الاستاد بملاحظة عدم استطاعتك الذهاب الى منطقة الاستاد في حالة عدم حصولك على تذكرة

عندنا طيب ؟؟ كم عدد المشجعين الحاضرين للاستاد واضطروا الى ركن سياراتهم في الحواري المجاورة للملعب ؟ كم مرة شفنا ناس معها تذاكر لكن مالها مكان في الملعب ؟؟

استراليا بتستضيف كاس العالم في 2016 ,, غريب صح؟ دوري المحترفين ماله الا 3 سنوات هذي السنة الثالثه ولا عندهم الا دوري واحد بعكس السعودية اللي فيها كل انواع الرياضات وبجميع المراحل لكن مكانك سر حتى بدون تخطيط للسنة الجايه واللي متوقع انه يصير فيها..