أحمد جاي للرياض هالايام ويبي يسوي لقاء مع مدوني الرياض .. حسب ما كتب في البوست انه بيكون يوم الخميس الجاي 2 مارس .. اللي وده يجي يكتب اسمه هنا عشان نشوف كم واحد راح يجي

تحديث:

المكان د.كيف – طريق الملك عبـدالله,, والحساب على الدكتورة

تسعة أمور تقتل الابداع في نفس الشخص :

• كن متذمراً !
• كن منطقيا!
• لا تخالف القوانين
• كن جادا!
• كن منطوياً على نفسك
• لا تتعب نفسك في قراءة التفاصيل ,, وقتك أثمن من أن تضيعه في قرائتها
• تجنب الوقوع في الأخطاء والا سوف تعاقب على فعلها !
• تيقّن في نفسك بأنك لست مبدعا
• اعلم أن هناك جواب واحد صحيح لكل سؤال وأنك الوحيد الذي تعرفه

نقلة كبيرة لنوكيا في توفيرها الـ WI-FI في جوالاتها

منعت شركة ياهو ورود لفظ Allah من امكانية تسجيله في العنوان الالكتروني … طبعا شعوبنا العربية الكريمة ثارت على ولا شي وليه يمنعونه وانهم ضدنا ومن هالكلام اللي حفظناه …

طيب دقيقة وقفوا معي وقفة تفكير لا أكثر .. هل في أحد بيسجل ايميله باسم Allah ؟؟
بتقولون لي اسم عبدالله كيف بيكون وضعه .. المتعارف عليه اسم عبدالله بالانجليزي يكتب كذا Abdullah هل واجهوا اصحاب هالايميلات مشاكل في الدخول لايميلاتهم ؟؟؟ ما اعتقد

طيب ليه كل هالهيجان والثورة اللي صارت ؟؟؟ عشانهم منعوه ؟؟ أحسن خلهم يمنعونه على الاقل نضمن أن اللفظ هذا ما يستخدم في أعمال سيئة وتنسب للدين بأي شكل كان ..

اليوم كان أول يوم دراسة رسمي لي في المعهد كانت الايام اللي راحت ايام تعريفيه بالطلاب و المناهج ومن كان فيه الدراسة الجاده .. حضرت اليوم متأخر للمحاضرة ودخلت وبحكم اني عايد الترم ما كنت احتاج اني انتبه للشرح وفي الاساس الماده سهلة ولا تقدر تنساها بسهولة .. هذا من فضل ربي

في خلال المحاضرة والمدرس متحمس يشرح فيه واحد عطس طبعا مشينا الموضوع عادي الواحد يعطس لكن بعد ما عطس نحتريه يقول الحمد لله … ما قال شي وليته سكت عند هالحد قال كلمة “Sorry” .. انا وقف شعر راسي بس ابي اعرف منهو هاللي قالها واللي زاد القهر ان المدرس ساكت ما قال شي .. طيب اوكيه المدرس قال لا اسمع ولا كلمة بالعربي في القاعه بس ما توصل لهالحد .. لحد اني ابدل كلمة الحمد لله بكلمة Sorry .. لا يجي واحد يقول نفس المعنى والمعنى في بطن الشاعر .. هذا شرع مو لعب .. انا ما ادري هل هو جهل ولا اظن انه جهل لان حتى الاطفال يعرفون الاشياء هذي وحتى اذا عطست عند ولد صغير هو يقول الحمد لله عنك …

انك تستخدم اللغة في حياتك وفي دراستك عشان تقويها مب حرام ولا عيب بالعكس اتمنى اني اسوي الشي ذا لكن اذا وصل الواحد لحد الدين بوقف …

شي في خاطري وبغيت اطلعه

ماكان عندي نية اليوم اني اروح للجنادرية لاني اصلا ما دريت انها بدت الا من خويي اللي اتصل علي وقال ان ودي اروح كان ودك تخاويني قلت يالله انا فاضي اليوم ما وراي شي خلنا نروح .

رحنا الساعة 3 العصر ولا وصلنا الا الساعه 4 وشوي لان الطريق كان زحمة مرة تقل الناس ما بعد شافوا جنادرية
كانت هذي ثاني مره أروح لها رحت قبل ست سنوات والاماكن هيّا هيّا ,, ما تغير شي نفس الاماكن ونفس الفعاليات اللهم ان فيه دكتور كيف وكودو فاتحين في الجنادرية ,, خوش تراث

تجنبت أني أدخل أي معرض رسمي لانك من تدخل يعطونك أوراق مالها سنع واكياس ويصير مالك شغل الا هالاكياس وفي الاخير أقرب زبالة وترميها فيها عشان كذا تجنبت هالمعارض ورحت للاشياء المباشرة ناس تبيع كليجا وناس تسوي خبز وناس تنحت وناس تسوي نبابيط – جمع نبّيطه وهي ما يسقط به العبري من السدرة من أول – والكتاتيب برضوه العجيب انهم غيروا اللي كان متواجد من عرفت الجنادرية وجابوا علي المدفع لكن ما كان بتميز الاول لانه كان راكب عليه الدور مره الجميل في علي المدفع انه استخدم لهجة نجد الأصلية القديمة لدرجة اني صرت أضحك على كل كلمة يقولها من قِدم الكلمة

رحنا للقصيم واللي مالقينا فيها الا ناس تبيع كليجا لكن اللي كان عنده الزحمة اللي يبيعها من الفرن على طول يطلعها ويبيع للناس والحبة بريال .. ولقينا بعض الالعاب القديمة وأهم شي شفنا البي بليد القديم …

ورحنا لجناح المدينة وكان هو المتميز جدا فكانت البوابة تغصّ من كثرة الزوار والقهر انك تدخل وتلقى كل الاكلات عندهم لكن يبي لك تصف سرا هذا طوله عشان تشتري فرحت شريت حبق ونعناع وطلعت …

أكثر ما أعجبني في الزيارة هو عازف الربابة .. تمنيت أني جلست أطول من الفترة اللي جلستها لكن خويي مايحب الاشياء ذي لذلك جرني غصب والا انا ماودي اروح عنه ,, صراحة كانت جرته عليها رهيبه مره لدرجة انك تندمج معها غصب. كذلك الاشياء الرئيسية في الجنادرية السواني وهي البعارين اللي تطلع المويه من القليب – القليب هو البئر – .. كذلك الحراثين وهم الثيران اللي تحرث الأرض والحمير أكرم كل قارئ اللي تدوس على التبن صراحة انا الى الان ما بعد عرفت وش فايدة هالشغلة

بشكل عام تمتعنا في هالزيارة خصوصا أن الجو كان باردا وغائما وممطرا

أترككم مع الصور