صباح الخير ,, طبعا مثل ماتشوفون النظافة طاغية على المكان .. غيرت التصميم لان التصميم الاول أجمع العلماء بأنه أكل الدهر عليه وشرب لذلك جرى التغيير ,,, الامر الاخر اني راح أكتب عن شخصية هاري بوتر .. طبعا الشخصية خيالية .. لكن لا مانع من القراءة عن بعض الشخصيات الخيالية في بعض الاحيان

الحمد لله طبت … كنت الاسبوع اللي راح تعبان شوي والله مب شوي بس يعني الحمد لله ,, رحت كنت ابشوف اعتزال يوسف الثنيان مع واحد من اخوياي بس تخبرون من زود حبي له وزعلت عشانه بيعتزل ويخلينا تعبت ورحت ورقدوني في المستشفى من عقب صلاة العشا الين الساعه 1 الليل في الاخير قالوا مافيك شي رح لاهلك قلت طيب

واقعد اسبوع كامل على هالحال اتعب عقب العشا ولا اطيب الا الساعه 11 الليل ,,, شكلي مسكون .. الامر ذا خلاني اغيب طول الاسبوع اللي راح الامر اللي خلا المعهد يقولي انقلع خذ ملفك .. قلت يا ولد منا ومنا قالوا وخر رح كان معك عذر تعال نسجلك عشان تدرس الترم الجاي والا الحين مالك امل قلت معي اجازة طيب ,, قال مالنا شغل فيك الدراسة الحين راحت عليك عاد انا ضربت انبيراتي ” وفي رواية امبيراتي” يعني انقهرت حرام المفروض الحين متخرج بس وش اسوي في ذولي ناس تروح وتجي وانا قاعد في المعهد .. – الطنزة ما تبطي – .. عاد بكره ابروح لهم اعطيهم الاجازة عشان ما يقولون خذ ملفك الله يستر لا يجون بكره ويقولون انت حاذف ترم خلاص ما لك اعادة … همن من جد أبصيح . عاد ابيها من الله ,, يوم الاربعاء اللي راح عندي اختبار ماذاكرت ولا دريت عنه الا قبل مايبدا بساعه دخلت وانا عيني على ورقتي وعيني الثانيه على ورقة اللي جنبي ولا بعد يمكن اجيب 4 من 30 لاني داري ان هاللي جنبي جايب العيد بس الموت مع الجماعه رحمة

طبعا الحين مالي شغل ولا مشغلة قاعد اتابع الدوري القطري والدوري السعودي والدوري البرتغالي وكل دوري يجي في التلفزيون .. عاد راسلت عبود عشان اشوف كان نزلت كروت الجزيرة الرياضية لحالها والا لا والظاهر بكره ابروح لهم واشترك واقعد اشوف الاسباني والايطالي …

تشوفون غيرت شي بسيط في العنوان خليت له خلفية عقب ما كنت اسولف مع عبدالله امس كنت ابغير التصميم بس مابي اصمم انا ابي شي جاهز بس للاسف مالقيت شي يمثل شخصيتي – لا تخلينا – عاد قلت ابغير لو شوي .

شقحة : تروبيكانا فواكة مشكله ,, كذا (Y)

قاعد انبش بجهاز اختي ولقيت هالصورة مدري من وين جابتها منه أتوقع اني عرضتها هنا بس انمسحت من الموقع أبعرضها اعادة للذكرى لا أكثر

آرائكم ,, علما انها من سنتين تقريبا مصورها او اكثر

يعني عشاني رايق هالايام ومستاسع صدري أبجيب لكم مواضيع خفيفه وأبخلي الثقيل لأهله
الحين فيه العاب قديمة كنا نلعبها بس الحين ما نشوف حتى بزرانا يلعبونها ,, ايييييه زمان اول تغير …. فيه مزي حبشة وواحد طش ,, والكيرم اللي مابعد شفت احد هالايام يلعبه وان ذكرته عند احد قعد يضحك علي ,, اييه دونيا

من هالالعاب لعبة طجمة ,, صراحة مدري من مسميها كذا والا من وين جت هالتسميه ,, لكن ولو طجمة يعني طجمة ,, اللعبة شلون تنلعب؟؟؟
تجيب كاسين حديد من الكيسان اللي نلقاها في محلات الفوالين ,, ونحطها فوق بعض بالمعكوس ,, يعني نقلب الكاس على فمها تطلع البنت لامها … قصدي نقلب الكاس على راسه ونحطه على الارض همن نحط نجلس الكاس الثاني فوقه ,, همن يكون فيه فريقين … ونجيب كورة من الكور اللي تجي في محلات ابو ريالين تجي ثلاث كور فوق بعض لونها اخضر >>> طيب خلاص فهمنا …. ياخذها الاول ويلعب ثلاث ادوار يعني يرجمها على الكاس همن يرجم ثانيه وثالثه وان طقته وطاح الكاس يروح الفريق الثاني ياخذ الكورة وينحاش الفريق اللي طيح الكاس ,, واهم شي يطقون اللاعبين كلهم قبل لا يجون ويصلحون الكاس اللي خربوه وان صلحوه تحسب لهم نقطه وان ما زينوه يروح الدور للثانين … وكذا الين ما تتكسر ظهورهم والا يملون والا يطيح واحد وينكسر

الحين اذا اهداك واحد هديه وش أول ما تفكر فيه ؟؟؟ ,, أو انت بتهدي واحد هدية وش تفكر فيه اذا جيت تهديه هديه ؟؟
الصراحة عندي تأويل لأغلب الهدايا وأيدني فيه أكثر من واحد مدري يمكنه غلط او يمكنه هبال ,, لكني وصلت له وطلع أكثر من واحد يفكر كذا ,, يعني طلعت انا نيوتن والباقين قراوى >>> علق على هالمثل

يعني مثلا لو أهديت واحد عطر كأنك تقول له يالمخيس خيستنا بريحتك تعطّر >>> تفسير شخصي لا تطيرون في حلقي
والا تهديه صابونه كانك تقول له تنظف ,, والا تهديه نظارة كنك تقول انك نظرك مب زين والا احول انت وممكن تجي انك خايف عليه وعلى عيونه :$

يعني ما عمركم فسرتوا أشياء مثل كذا

يالله انك تجعل هالكلام حجه لي مب علي عند بعض الناس …
كنت أول يعني أول من زمان وانا في اولى ابتدائي وانا توني مدري وش الدنيا ومدري وش الله قايلن بي ,, كان فيه واحد من اخواني – بيطقني لو شاف البوست – الله يهديه هو اللي خلاني أشجع النصر طبعا كان كل مباراة للنصر يروح لها وياخذني معه ,, كنت انا وياه النصراويين والباقي كله هلال .. كان ياخذني معه ايام ما كانت المباريات في الملز والعصر ايام ماجد عبدالله والجيل الذهبي صراحة ,,, أما الحين خمام الا ما ندر حقيقه
المهم كنا نروح وانقطعت فترة طويلة عن الملاعب ,,, أخوي عقل ما عاد صار يروح همن اعرس ونسانا ونسى الدنيا … دارت الايام وجاه ولد و ينشأ ناشئ الفتيان فينا على ما كان عوده أبوه ,, ويصير نصراوي الولد صميم حتى اكثر مني … المهم كنا نتغدى يوم جمعة كان فيه اخوي ذا وولد اخوي ثاني طبعا فيه ناس ثانين بس هم الزبده ,, ولد اخوي ذا هلالي مدري وش جاب طاري الهلال والنصر المراد ان اخوي ذا عرف ان ولد اخوي هلالي قال ااه لو اني داري عنك من قبل كان ورطتك مثل ما ورطت غيرك ,,, اللي هو أنا طبعا >>> مغلوب على امره …… قلت عاد انا اوريك كان فيه مباراة قريبه بين النصر والهلال وقلت لولده تروح معي وهو ما صدق خبر قال لابوه وابوه كن وده يعيي بس وافق قال كودها مره وتنتهي … وأروح وأطق له ذاك اللبس النصراوي شال وعلم ولبس وكلش شي اصفر في أصفر … كانت مباراة الهلال والنصر هالسنة في كأس الامير فيصل بن فهد يوم فاز الهلال 2-0 .
7
7
7

7
7
اذكروا الله

همن بعدها تحطم الولد قال بننهزم كل مره وان النصر مب شي ,,, واخذه معي مباراة القادسية والولد تحمس صار كل مباراة يجي يسألني بتروح لها والا لا وان كاني ابروح خذني معك حتى بعض الاحيان أنسى ان فيه مباراة ويدق يذكرني ترا فيه مباراة خلنا نروح لها
آخرها مباراة النصر مع الاتفاق اليوم اللي فاز فيها النصر ,, دق علي ابوه قال وش سويت بولدي يبي يروح الملعب خربتاه علينا ,, ضحكت ضحكة شيطانية قلت خله احسن ..

عاد المباراة الجاية مع الوحدات ان شاء الله اني ابروح واباخذه معي ,,, كود ابوه يطيع عاد أحس انه حقد على شي اسمه نصر

وهذي بعض الأهداف الماجدية من التاريخ الماجدي رفعتها على موقع قوقل حق الفديو وعقب الطقاق وافقوا عليها
1- صفحة البحث
2- أهداف على الطريقة الماجدية ,, لا يفوتكم الهدف الاول أحس الحارس يقول حسبي الله عليك يا ماجد كانك شهّرت بي