طبعا تشوفون الشاب اللطيف اللي مرتز فوق له اكثر من اسبوعين >>> بعض الناس يقولون يشبهني :S
ماعلينا … انا احس اني ابطيت عليه يقول خلاص نزلني فكني من شرك لا عاد تكتب عني ماعاد ابي قلت له يارجال اذكر الله وخلك مكانك الين يفرجها الله وننتهي منك ونقلعك >>>صريح جدا قال زين بس عجل علي تراني مليت ابرجع مكاني . قلت ابشر هالاسبوع ان شاء الله والانا قالعينك ولا عاد نبي نشوف خشتك ابد.

تذكرون خويي الترندادي اللي سولفت لكم عنه
جاني قبل يومين قال يافهد عطني موقعك قلت ليه قال يا رجال عطنيه اخلص
قلت ابشر بس وش تبي به قال أبتفرج مع اني ما افهم شي قلت ياسلام
قال مع اني ما افهم شي بس ارتاح اذا دخلت موقعك
هنا احس انه كبر راسي :>
قلت في نفسي ايه هين
عاد قلت له اني كتبت عنه واني تعرفت عليه
عاد هو انبسط
صار يقولي انت صديقي

سألوني وشو البلوق Blog ?
قلت لهم سردال ما قصر وشرحها
لكن بعضهم ما فهم وش المقصود بال Blog او وش ترجمتها
كلمة Blog ككلمة مالها اي ترجمة في اي قاموس
لكن ابختصر عليكم الطريق واقولكم
هي مواقع شخصية بحته لأشخاص لهم اهتمامات معينه متعددة او له اهتمام واحد
يكتب فيها الشخص عن اللي يبي ماله مجال معين يكتب فيه
اليوم مزاجه يكتب في الكورة يكتب في الكورة مافيه مشكلة
بكرة يتكلم في الانترنت ومالوه يتكلم في الانترنت
بعد بكرة ماوده يكتب اوكي براحتك لا تكتب
ميزتها انك ماتتقيد بمجال معين تكتب عن اهتمامك اللحظي او اهتمامك الدائم

يعني ما تتقيد باسلوب او طريقة معينه او تخصص معين اكتب ما بدى لك ولا فيه رقيب عليك الا الله ثم نفسك.

اتمنى اني شرحت المعنى الحقيقي لل blog
سألت خويي الترندادي >>> لحوول كن ماحد عنده خوي الا انت :>
وش معنى blog الصحيح
قالي : personal log
يعني هي مواقع شخصية بحته مايغلب عليها طابع الرسمية
انما تعكس صورة عن صاحب الموقع.

قلتها و بأعلى صوتي أريد أن أتخصص ولكن لم يجب أحد … أجابو ولكن لم يعطوني الجواب الشافي أعطوني ولكن لم أجدد ما أتخصص فيه.

انا عندي مشكلة اني أبي أتخصص لكن ماعندي شي محدد احب اسوي كلش و استمتع اني أسوي كلش
وفيني ميزة اني اذا دخلت مجال معين
أول انتاج لي فيه يكون ماعليه كلام لكن الثاني والثالث والرابع دماااار
اخذ من المجل الاساسيات وبعدين خلاص ما عاد اهتم به
ممكن ارجع له بعدين لكن مب بنفس الحماس اللي كان عندي اول
أتمنى أحد يجاوبني على سؤال

وش لون أتخصص ؟

بعض المنتديات تلقى فيها ناس مبدعه تتعب في المواضيع اللي يكتبونها لكن القهر انك تلقى واحد ينقل الموضوع لمنتدى ثاني ممكن نقول عادي كلها منتديات
لكن اللي يقهر أكثر انك تلقى الموضوع في الجريدة ولا ينسب الى راعي الموضوع او على الاقل للمنتدى المكتوب فيه
مرة كان فيه موضوع قوي اسمه [url=http://www.mexat.com/vb/showthread.php?t=12884]الخديعة الكبرى[/url]في منتدى وكنت اتابعه الى ما انتهى راعي الموضوع من كتابته لكن بعد يومين بس لقيت الموضوع مسرود له صفحة كامله في جريدة الجزيرة السعودية وبدون أدنى ذكر للمصدر وفيه موضوع كان مكتوب عن [url=http://fm.82lj.net/forum/showthread.php?t=12070]عمليات الليزك[/url]
وكذلك سُرق ولكن هالمرة بفبركة صحفية بعد تغيير العبارات العامية الى عبارات بالفصحى . لماذا؟

كل هذا هذا عجز في الصحافة انهم يكتبون مقالات عن نفس المواضيع بمصادر خاصة او بمعنى اخر ياخذون الفكرة و يكتبون المحتوى من أنفسهم لأن الصحيفة عندها مصادر خاصة.

وهذا يقود الى موضوع ثاني متى بنشوف الحقوق الفكرية على النت وخاصة كتّاب المنتديات ؟

الصراحة هالمستوى اللي انا فيه في اللغة الانجليزية مع انه الادفانس لكن يضل أصعب شي علينا مادة الاورال (محادثة) خاصة في الاختبار , المستويات اللي راحت كانت الاختبارات سهلة يقعد معك الدكتور ويسألك كم سؤال وتروح لكن هالمرة لا لازم تجهز ثلاث مواضيع من اختيارك وتكون لك قائمة بالكلمات المساعدة وتطلع قدام الطلاب وتلقيها لا ومن زين الطبايع ان المدرس هو اللي يختار وش تقول منالثلاث اللي انت اخترت , واللي زاد الطين بله اني ما اخترت الا أصعب المواضيع اللي هو التاريخ الاسلامي ” تحدث عن الاسلام من البدايه الى النهاية” والموضوع الثاني ليه تفضل العيش في المزرعة عاد هالموضوع مدري ليه خذته مع ان فيه حوالي 120 موضوع بس اكثرها موخوذه يعني مالك امل, والموضوع الثالث انا جبته من نفسي اللي هو الانترنت بشكل عام عاد هذا من جد مدري وش اقول فيه بس ابحاول واتدرب لأن ماعندي نية أدرس في الصيف غصب
خصوصا اني ما جبت درجة زينه في الاختبار اللي راح وكان مقارنة بين القطاع الخاص والقطاع العام الصراحة بدعت فيه لكن ضاعت مني كلمة ماعاد عرفت اكمل وضيعت وعشان كذا جبت درجة شينه
ادعوا لي الله يوفقني في هالاختبار خاصة

من يوم أُعيد افتتاح الموقع من جديد ما كتبت الا موضوع واحد و اشكر كل من عقّب عليه . احس اني كسول مابي أكتب شي او بالاصح مالقيت شي اكتب عنه عشان كذا كذا تحملوا هذرتي في هالموضوع .

حرباز : الحمد لله على السلامة رجعتك للموقع ومشكور على انك سألت عني في موقعك “يالحوووووت” وبريدي في الجهة اليسرى من الموقع لكل من يبي يراسلني , صفحة المراسلة من زمان و انا اقول أبحطها لكن ما كتب الله اني أحطها فخلوها بعدين الين ما افضى >>> الاشغال مقطعتك انت ووجهك

فيه مشروع في بالي وهو قيد التنفيذ لكن ناقصي تصاميم تكون بال CSS وانا من جنبها في التصميم واكبر دليل هالتصميم والالوان حقته

فياليت احد يشاركنا بأفكار او حتى تنسيق الالوان .
والمشروع بس ناقصه كذا ويكمل ويشوف النور كأول مشروع لي على النت >>>>> اقعد يامشروعه