أستغرب صراحة من بعض الاعلامين حملتهم ضد باكيتا .. بداية من اختيار عناصر المنتخب وانتهاء الى نهج المنتخب وطريقة لعبه .
بصراحة ,, اذا قعدت تنقد احد على كل خطوة يسويها واي عمل يسويه ما راح ينتج لك أي شي ,, باكيتا ماله سنه من مسك المنتخب وما شارك في أي بطولة سوى كاس العالم وكاس العالم ماهيب مقياس للمنتخب لاننا متعودين نروح نترقع ونرجع .. جميع المباريات اللي لعبها باكيتا هي مباريات ودية وهي بغض النظر عن نتائجها تعتمد على المدرب ,, مدرب يبي يجرب لاعب ومدرب يبي يجرب تكتيك معين .. باكيتا هذي أول بطولة رسمية يلعبها بعد كاس العالم ماتقدر تحكم عليه الا بعد ما تنتهي البطولة وتجي تشوف النتائج وش سويت ووش غلطت فيه ساعتها تقدر تحاسبه لانك انت عطيته المساحة انه يشتغل فيكون ماله عذر اذا فشل. لكن من حوار قريته لباكيتا في أحد الصحف انه ما يخاف من الاقالة وهذا يعني ان فيه ضغوط رهيبه على المدرب والا راح يقال وبتكون هذي أكبر غلطة للاتحاد اذا تم اقالته , انت قبل سنة متعاقد معه لمدة 3 سنين تجي بعد سنة واول فشل تقيله ؟؟ كاس اسيا ما بقاله شي عقب كاس الخليج بفترة بسيطه وين تلقى مدرب ممتاز ومتى راح يتعرف على اللاعبين ومتى راح يتأقلمون على طريقته .. وعشان نكون واقعيين مشكلة المنتخب ماهيب في المدرب المشكلة في العناصر اللي عنده ,, مافيه العناصر اللي تبرد التسبد مافيه عناصر تخليك ضامن انك رايح تجيب بطولة مب رايح تشارك وتجي فمهما تجيب لهم مدربين ما راح يتغير في مستواهم شي صحيح التكتيك بيتغير لكن هذا حسين وهذي خلاقينه . اذا ما نجح مدرب برازيلي معك من راح ينجح ؟؟ المدرب البرازيلي هو انجح مدرب يدرب اللاعب السعودي والشواهد كثيره .. لكن انك تقيله على اساس انه ما نجح ,, ليه تقيل كالديرون من قبل وهو الناجح معهم والا عشانه في بطولة ماهيب بذيك الاهمية وقعد يجرب فيها لاعبين صغار على اساس كذا اقلته .. مشكلتنا اننا نبحث عن النتائج الوقتيه ومانبحث عن النتائج المستقبلية .. انا مع باكيتا يوم يقول ان كاس الخليج مب بأهمية كاس اسيا وهو صادق كاس الخليج انت ضامن انك تلعب فيها كلما اقيمت لكن كاس اسيا لا ويبقى كاس الخليج بطولة أشبه ما تكون بالبطولة الودية على نطاق محلي والمستويات متقاربة بشكل كبير لكن في كاس اسيا فيه منتخبات قوية وخصوصا بعد ما دخلت علينا استراليا ومنتخب اليابان شفناه وش سوى بنا وحنا عندهم وكم رقعنا وهم بالرديف مب بالفريق الاول اذا على كذا استراليا وش بتسوي ؟؟
أتمنى أن يترك باكيتا يعمل حتى نرى النتائج ..
Filled under General
View reactions
هلا فهد
تدري وش المشكله ؟
المشكله ماهيب بالاعلاميين
البلا والله باللي ماسكين الاتحاد السعودي
وهم اللي معطين الاعلاميين فرصه يبربسون للاسف
ولا لو فيه ناس شديده كان مااحد قدر يفتح فمه
وغير هذا ماهو باكيتا بس قبله كالديرون هو اللي أهلهم لكأس العالم وشبوا فيه الاعلاميين وماصدقت رعاية الشباب وشالته علشان دوره قطر وهو قايل اصلا داخلين علشان نجرب مجموعة عناصر
ويعطيك العافيه طلعت بتدونك هذي كل اللي بقلبي
كويس .. اخيرا كتبت
شف كلامك عين العقل .. والمشكلة انها بطولة خليجية يعني المفروض المنتخب يدخلها كبطولة اعداد أو ودية قبل كاس آسيا .. لكن المشكلة حنا نعطيها اكبر من حجمها دايما ونرجع منها عائدين لنقطة الصفر من اول وجديد .. ومدرب يروح وثاني يجي .. وهكذا دواليك .. طبعا مايمديك على دواليك ذي لو تفحط سنة
Saad :
مشكلة الاتحاد ان الاعلام مسيّرة .
أحمد :
يعني بعد باكيتا توقع ناصر الجوهر يجي عقبه
الكاس اماااااااااارااااتي انشالله