ماكان عندي نية اليوم اني اروح للجنادرية لاني اصلا ما دريت انها بدت الا من خويي اللي اتصل علي وقال ان ودي اروح كان ودك تخاويني قلت يالله انا فاضي اليوم ما وراي شي خلنا نروح .
رحنا الساعة 3 العصر ولا وصلنا الا الساعه 4 وشوي لان الطريق كان زحمة مرة تقل الناس ما بعد شافوا جنادرية 
كانت هذي ثاني مره أروح لها رحت قبل ست سنوات والاماكن هيّا هيّا 
,, ما تغير شي نفس الاماكن ونفس الفعاليات اللهم ان فيه دكتور كيف وكودو فاتحين في الجنادرية ,, خوش تراث
تجنبت أني أدخل أي معرض رسمي لانك من تدخل يعطونك أوراق مالها سنع واكياس ويصير مالك شغل الا هالاكياس وفي الاخير أقرب زبالة وترميها فيها عشان كذا تجنبت هالمعارض ورحت للاشياء المباشرة ناس تبيع كليجا وناس تسوي خبز وناس تنحت وناس تسوي نبابيط - جمع نبّيطه وهي ما يسقط به العبري من السدرة من أول - والكتاتيب برضوه العجيب انهم غيروا اللي كان متواجد من عرفت الجنادرية وجابوا علي المدفع لكن ما كان بتميز الاول لانه كان راكب عليه الدور مره الجميل في علي المدفع انه استخدم لهجة نجد الأصلية القديمة لدرجة اني صرت أضحك على كل كلمة يقولها من قِدم الكلمة 
رحنا للقصيم واللي مالقينا فيها الا ناس تبيع كليجا لكن اللي كان عنده الزحمة اللي يبيعها من الفرن على طول يطلعها ويبيع للناس والحبة بريال .. ولقينا بعض الالعاب القديمة وأهم شي شفنا البي بليد القديم …
ورحنا لجناح المدينة وكان هو المتميز جدا فكانت البوابة تغصّ من كثرة الزوار والقهر انك تدخل وتلقى كل الاكلات عندهم لكن يبي لك تصف سرا هذا طوله عشان تشتري فرحت شريت حبق ونعناع وطلعت …
أكثر ما أعجبني في الزيارة هو عازف الربابة .. تمنيت أني جلست أطول من الفترة اللي جلستها لكن خويي مايحب الاشياء ذي لذلك جرني غصب والا انا ماودي اروح عنه ,, صراحة كانت جرته عليها رهيبه مره لدرجة انك تندمج معها غصب. كذلك الاشياء الرئيسية في الجنادرية السواني وهي البعارين اللي تطلع المويه من القليب - القليب هو البئر - .. كذلك الحراثين وهم الثيران اللي تحرث الأرض والحمير أكرم كل قارئ اللي تدوس على التبن صراحة انا الى الان ما بعد عرفت وش فايدة هالشغلة
بشكل عام تمتعنا في هالزيارة خصوصا أن الجو كان باردا وغائما وممطرا
Filled under General
View reactions