الحمد لله طبت 
… كنت الاسبوع اللي راح تعبان شوي والله مب شوي بس يعني الحمد لله ,, رحت كنت ابشوف اعتزال يوسف الثنيان مع واحد من اخوياي بس تخبرون من زود حبي له وزعلت عشانه بيعتزل ويخلينا تعبت ورحت ورقدوني في المستشفى من عقب صلاة العشا الين الساعه 1 الليل في الاخير قالوا مافيك شي رح لاهلك قلت طيب
واقعد اسبوع كامل على هالحال اتعب عقب العشا ولا اطيب الا الساعه 11 الليل ,,, شكلي مسكون .. الامر ذا خلاني اغيب طول الاسبوع اللي راح الامر اللي خلا المعهد يقولي انقلع خذ ملفك 
.. قلت يا ولد منا ومنا قالوا وخر رح كان معك عذر تعال نسجلك عشان تدرس الترم الجاي والا الحين مالك امل قلت معي اجازة طيب ,, قال مالنا شغل فيك الدراسة الحين راحت عليك عاد انا ضربت انبيراتي ” وفي رواية امبيراتي” يعني انقهرت حرام المفروض الحين متخرج بس وش اسوي في ذولي ناس تروح وتجي وانا قاعد في المعهد .. - الطنزة ما تبطي - .. عاد بكره ابروح لهم اعطيهم الاجازة عشان ما يقولون خذ ملفك الله يستر لا يجون بكره ويقولون انت حاذف ترم خلاص ما لك اعادة … همن من جد أبصيح . عاد ابيها من الله ,, يوم الاربعاء اللي راح عندي اختبار ماذاكرت ولا دريت عنه الا قبل مايبدا بساعه دخلت وانا عيني على ورقتي وعيني الثانيه على ورقة اللي جنبي ولا بعد يمكن اجيب 4 من 30 لاني داري ان هاللي جنبي جايب العيد بس الموت مع الجماعه رحمة
طبعا الحين مالي شغل ولا مشغلة قاعد اتابع الدوري القطري والدوري السعودي والدوري البرتغالي وكل دوري يجي في التلفزيون .. عاد راسلت عبود عشان اشوف كان نزلت كروت الجزيرة الرياضية لحالها والا لا والظاهر بكره ابروح لهم واشترك واقعد اشوف الاسباني والايطالي …
تشوفون غيرت شي بسيط في العنوان خليت له خلفية عقب ما كنت اسولف مع عبدالله امس كنت ابغير التصميم بس مابي اصمم انا ابي شي جاهز بس للاسف مالقيت شي يمثل شخصيتي 
- لا تخلينا - عاد قلت ابغير لو شوي .
شقحة : تروبيكانا فواكة مشكله ,, كذا (Y)
Filled under General
View reactions
أهلا - عزيزي - فهد ..
بداية ، شفاك الله وأعانك ، وطهور إن شــاء الله ..
من خبرتي - المتواضعة - في الحياة ، يبدو لي بأنك لست مريضا بمرض عضال ، وإنما مريض بـ مرض - نفسي - ” لا لست مجنونا بعد ” ، ولكنك مصاب بمتلازمة - خوليوس سانشيز فيكتوريا - النفسية ..
فـ الظاهر لي من كلامك ، ومن - توحمك - على التروبيكانا ، وحزنك - اللامبرر - على إعتزال يوسف ، أنك مصاب بما يسمى - الحب - ..
يبدو أنك قد كبرت يا فتى ، وأصبحت تحب ، وعقلك الباطن أصبح يوحي لجسدك بأنك مريض ، وينفذ جسدك هذه الإيحائات ويترجمها إلى أعراض ظاهرة فتحس بـ - أشياء غريبة - ..
سببها بسيط جدا - سأخذ نفساً هنا - ، إنك ببساطة تحاول جذب الإنتباه لك ، تعاني من - فقد للحنان والإهتمام - من قبل الشخص - المحبوب - ، ويسعى عقلك الباطن للمزيد منه فيحاول أن - يتمرد ويعلن عن نفسه - ..
حاول الإكثار من السوائل - مياه بيريه المعدنية على وجه الخصوص - ، وابتعد عن مشاهدة المسلسلات والأفلام المصرية والمكسيكية وعلى رأسها الهندية ..
عليك أن تستلقي ثلاث مرات يوميا في غرفة مظلمة ، تغمض عينيك وتتخيل أنك أصبحت - جورج قرداحي - ، أنك أصبحت وسيما ، وذا - كارزيما - هائلة ..
في النهاية يا عزيزي لا تخف ، فـ لست بحالة ميؤوس منها ..
كثيرين استطاعوا الوصول إلى بر الأمان ..
تحياتي لك ، وأسعد بعرض مساعدتي لك ..
يمكن كلامك صح ,, لاني رفضت اسوي اشعة لصدري ويوم قالي ليه قلت خايف على صورة حبيبي من الشوف
>>> ولا يهون ابو خالد 
سلامات والله وما تشوف شر!
لا يصير المعهد معهد الإدارة؟ ترى قاعد أسوي لهم مشروع.
بخرب قاعة ماوردي كلها!
سلامات!
سلامات ماتشوف شر ان شاءالله..ربي يوفقك ويسر امورك اللهم امين..انتبه لنفسك وشد حيالك وان شاءالله تلقى الخير وتتحقق كل تطلعاتك
ما تشوف شر فهودي
رائد السعيد: الشر ما يجيك ان شاء الله ,,, لا ابد خرب اللي تقدر عليه وماجاك علي
نسايم الكــــــــــادي : الشر ما يجيك ومشكورة على كلامك اللطيف
AbOd,وصلات : الله يسلمكم والشر مايجيكم ان شاء الله
أول شي سلامات ..
وثاني شي وش فيك مع المعهد .. تراهم ما يمزحون لين قالوا .. مع السلامة .. “دفشين بالحيل” ،، وحتى لو جبت لهم عذر او كذا يمكن يقولون لك تعال الترم الجاي .. هذا الترم مالك احد !!
يعني تدري وش القهر .. ان ما باقي على الترم شي ويروح عليك ..
عاد تصدق ان هذا الترم اطول ترم بحياتي الدراسية كلها .. !!
الله يوفقك .. ويعينك ..
تحياتي
——————
محمد
طهور لا باس اخوي المحارب
والظاهر ان المعهد اقتنعوا انك…؟
والدليل ان عيونك تزيغ ايام الامتحانات.
انت حاول توجه عيونك زين
وعني انا انهم بيقبلون اجازتك
وبالتوفيق يافهد